Un resabiu malcuráu de l’adolescencia ye la ellaboración de llistes fates de llibros de consulta que tengo que pillar pa completar dalgún tema.
Si, soi de los completistes.
Lo que pasa ye que la cosa va xorreciendo según voi pasando d’un tema d’interés a otru, en plan picaflor qu’entama milenta coses y acaba dalguna de xemes en cuando.
Si, tamién soi poco constante nel esfuerzu.
Pero sigo siendo fiel a los mios principios y, anque munches vegaes yá nun vaya mirar pa ellos, si apaez dalgún de los llibros que tengo nuna de les llistes, píllolu.
Si, tamién soi de los que marafundia perres a lo xo.
Nos últimos meses, aportaron a mio casa una docena de llibros que taben na llista de “Los más buscaos”, incluyendo media docena d’esos rarinos que namás pues consultar en biblioteques especializaes, enllenando una ficha y col carné na boca, mientes un funcionariu aburríu te ta xixilando, nun vaya ser…
Si, soi de los ratos de biblioteca que de xemes en cuando consulta llibros d’esos.
Y dalgún día llonxanu, seique cuando toles llistes tean completes, voi tener tiempu pa sacar alantre tanta llectura apartada y tantu proyectu d’escritura que pel momento nun ye nada.
Si, tamién con cosines asina se pue ser feliz, a veces.
