La formiga lleva venti años menos ún trabayando nel mediu audiovisual, una vocación pola que, nel so momento, tuvo qu’emigrar y tar unos años fuera. Nunca naide-y regaló nada y pasó por dalgún momentu malu. Últimamente taba percontenta porque alcontrara estabilidá: taba na so tierra, trabayaba ocho hores diaries (con dalguna más cuando tocaba) y el sueldu yera más o menos dignu. Como tenía familia y mercara un formigueru pequeñín, completábalo con dalgún trabayucu los fines de selmana pa poder permitise dalgún caprichu.
La chicharra entró a trabayar fai dos años nel mesmu mediu que la formiga, yá sabéis cómo son estes coses: a deu permediando un collaciu, porque enxamás se dedicara a esto. Por ocho hores de trabayu al mes cobra dalgo más de lo que cobra la formiga. Nada qu’obxetar a eso, suerte que tien, que diz l’otru, quien lo pillara y tal y tal…
Agora les dos van perder el trabayu, por circunstancies que nun vienen al casu. Les dos se quexen, con tola razón del mundu. Lo que pasa ye que yo, que cola vieyera toi faciéndome duru d’oyíu, siento que namás me duelen les quexes d’una de les dos.
Sedrá que soi malu.
