Tengo a un collaciu faciendo’l camín de Santiago a caballo. Monta un appaloosa (un caballu a llunares, como un dálmata, na feliz definición de mio ma) porque ye mui duru y lleva otru encoláu llevando la tienda y les provisiones. Va solu, y cuando salió de Roncesvalles dixéron-y que de xuru que nun llegaba, y qu’había que tar mui chifláu pa facelo asina.
Ayeri supi d’él. Tien un pique con una francesa que ta faciendo’l camín a pata, y que lu pasa cada poco. Tien el culu fechu un callu. Y la noticia ye qu’alcontró a otru más chifláu qu’él: un tío que salió de Portugal y va camín de Finlandia, tamién a caballo, y que calcula que-y queden tres meses tovía.
El mio collaciu va solu, pero tien una montonera collacios que-y van/vamos apurriendo coses (va tocame dir a Palencia, seique). Llevamos-y piensu y provisiones, y movémoslu en coche pa repartir el piensu de cinco en cinco kilos cada trenta kilómetros.
Bendita soledá.
