Mólenme les clasificaciones binaries. Nun van a parte nenguna porque toes son mentiroses y pues llanzar tantes como quieras.
Dicho esto, voi solmenavos con una.
El mundu divídese en dos: a los que-yos gusta la poesía d’Aurelio González Ovies, seya en castellán o n’asturiano, y los que nun tienen nin puta idea.
Una muestra:
El mio cantu, pal home
que nagua por llegar a so casa
y quier llavar les manes,
dar un besu a los suyos,
acércase al fueu,
responder a un abrazu,
o sentise tan solu
qu’humaniza una mesa.
Pal que ve lluz enceso
y respira,
pal qu’al goler el pan, se siente mui dichosu;
el que mira la lluna ensin querer pisala,
el qu’algama primero la sede que’l cántaru,
el que toca la rosa y nun l’arranca.
El que nunca rezó y a so manera reza.
Cuando lleía los sos poemarios en castellán, siempres almiraba esa cenciellez que paez fácil. Y tenía la sensación de qu’en dalgún poemariu (Vengo del norte, sobre too) yera muncho más asturianu escribiendo que munchos que lo facíen na llingua, lo que nun ye nin bono nin malo sinón tolo contrario.
Acaba de sacar el segundu llibru n’asturiano, El cantu del tordu, un poemariu que respira naturalidá y ta enllenu verdaes ablucantes, como tolo qu’escribe. Nun vos lu perdáis.
Posted by E Medina on 05/07/2009 at 07:33
Tienes más razón que un santo… válgame la expresión
Un saludo
Posted by julia on 05/07/2009 at 11:06
Toi d’alcuerdu. Ye ún de los más grandes, pa mi. Y pa tolos que m’arrodien. Cenciellamente verdaderu y nun gremial. Abrazos. Julia